Вака изгледа слободата во Британија: 474 лица уапсени на протест за Палестина, помеѓу нив и 89-годишна жена

Масовни апсења на протест во Лондон во поддршка на „Палестинска акција“

Во Лондон се уапсени 474 лица на протест во поддршка на забранетата група „Палестинска акција“, што претставува најголем број апсења во еден ден во последната деценија, јави Би-Би-Си. Од нив, 466 се уапсени за поддршка на организацијата, петмина за напад врз полиција, двајца за нарушување на јавниот ред и еден за злосторство од омраза.

Протестот, организиран од „Заштитете ги нашите поротници“, се одржа на Парламентарниот плоштад во Вестминстер и собра околу 600 учесници. Во 13 часот, демонстрантите подигнаа знаци со пораки „Се спротивставувам на геноцидот. Ја поддржувам Палестинската акција“. Полицијата, по предупредувања, почна да ги апси учесниците, меѓу кои и 89-годишна жена.

Министерката за внатрешни работи Ивет Купер ја бранеше забраната за групата, воведена во јули според Законот за тероризам, поради безбедносни причини. Амнести интернешнл, пак, ги оцени апсењата како „длабоко загрижувачки“ и непропорционални, нагласувајќи дека протестот бил мирен.

Уапсените беа ослободени со кауција со забрана за учество во идни протести во поддршка на групата, а оние без потврден идентитет останаа во притвор.