Во кинеската провинција северозападно од Шангај, необичен призор го привлекува вниманието на јавноста – куќа која стои среде новоизградениот автопат, затоа што сопственикот одбил да ја продаде.
Хуанг Пинг, сопственикот на имотот, не прифатил понуда од околу 200.000 евра и три заменски станови што му биле предложени како обесштетување за уривање на куќата. Како резултат на тоа, патот е изграден околу неговиот дом, кој сега е опкружен со две сообраќајни ленти од секоја страна.
Пинг живее со својот 11-годишен внук, но поради бучавата од градежните работи останува во куќата само ноќе. Единствениот пристап до домот е преку бетонска одводна цевка под автопатот, што е речиси невозможно за користење во дождливо време.
„Да можев да го вратам времето назад, ќе се согласев со условите што ми ги понудија. Сега се чувствувам како да изгубив голем облог. Малку ми е жал,“ изјави Пинг за списанието Метро.
Во Кина, ваквите објекти се нарекуваат „куќи со шајки“ и претставуваат имоти чии сопственици одбиваат да ги продадат заради големи инфраструктурни проекти. Оваа куќа, која сега буквално е во срцето на автопатот, стана симбол на инаетот – но и на последиците од него.
