Република

По локалните избори 155 хонорарци од тетовската болница ќе добијат трајно вработување

По завршувањето на локалните избори, 155 медицински работници кои со години работат со договор на дело во Клиничката болница во Тетово ќе добијат решенија за трајно вработување, потврди министерот за здравство Азир Алиу.

Тој појасни дека постапката е ставена во мирување поради законските ограничувања во период на избори, но дека е обезбедена согласност од Министерството за финансии, а тестирањата на кандидатите се спроведени на 7 јули годинава. За 155 работни места се пријавиле 290 кандидати.

„По изборите ќе продолжиме со последниот чекор за вработување. Анализите покажуваат дека во Тетово има потреба од над 300 вработени, па ќе отвориме и нова постапка за дополнување на кадарот“, рече Алиу.

Министерот денеска одржа работна средба со директорот на болницата Ерзен Елези и градоначалникот на Тетово Биљал Касами, на која се разгледуваа приоритетите за инфраструктурно унапредување и реконструкција на постојните капацитети.

Од вкупно 205 милиони евра предвидени за здравствени инвестиции во Тетово, Кичево и Штип, над 70 милиони ќе бидат наменети за Тетово, со можност за изградба на две нови и реновирање на три постоечки згради.

Република

„Шпанец“ се враќа на пругите: Модернизиран и подготвен за патници

Легендарниот воз „Шпанец“, некогаш заборавен и речиси отпишан, се враќа на пругите со целосно нов лик. Денес беше тестирана обновената верзија на возот, кој сега располага со модерен дизајн, телевизори, озвучување, алармни системи и видео надзор.

Одговорните најавуваат дека подготовките за поудобно и побезбедно патување се во полн ек, со цел патниците да уживаат во современо и безбедно патување.

Следуваат уште новости за враќањето на овој легендарен воз – останете со нас за сите детали.

Видеото може да го погледнете тука

Република

После многу години конечно Тетово ќе се украсува

На онлајн седница одржана денеска, 12 декември 2025 година, Советот на Општина Тетово со мнозинство гласови донесе одлука за украсување на градот за претстојните новогодишни празници.

„За оваа програма „за“ гласаше советничкото мнозинство составено од Коалицијата „Вреди“ и ВМРО-ДПМНЕ, додека против беа советниците од коалицијата НАИ. Воздржани беа од Подобро за Тетово, Левица и СДСМ. Со оваа одлука, Општина Тетово ја потврдува намерата градот да добие празничен сјај за крајот на 2025 година“, изјави претседателот на Советот, Јусуф Абдули.

Истовремено, изгласана е измена на Програмата за активности на Општина Тетово во областа на културата за 2025 година. Според новата програма, за празничното украсување се предвидени еден милион и петстотини илјади денари, што е над 24 илјади евра.

Република

Коњановски ги прими просветните работници на годината од Битола

Градоначалникот на Битола, Тони Коњановски, денеска оствари средба со добитничките на признанието „Просветен работник на годината“ за учебната 2024/2025 година – Наташа Тодоровска, наставник по одделенска настава во ОУ „Ѓорѓи Сугарев“, и Аница Б. Златевска, психолог во ОУ „Коле Канински“.

Коњановски им честиташе за значајното признание доделено од Министерството за образование и наука и Сојузот на просветни работници, нагласувајќи дека ваквите награди се симбол на поширока општествена заложба за почит и вреднување на улогата на наставниците, воспитувачите и стручните соработници во образованието.

Тој истакна дека трудот на просветните работници е фундаментален за формирањето на идните генерации и дека локалната самоуправа ќе продолжи да ја поддржува нивната работа.

Признанијата се доделуваат во рамките на кампањата „Магијата е во знаењето“, која Министерството ја реализира по повод 5 Октомври – Светскиот ден на учителите, со цел истакнување на незаменливата улога на учителите и зголемување на општествената почит кон нив.