Алатката за вештачка интелигенција ChatGPT ја користат околу 700 милиони луѓе неделно, изјави Ник Тарли, лидер за производи во OpenAI, во разговор за подкастот „Декодер“. Тој истакна дека компанијата не ја исклучува можноста за воведување реклами во популарниот четбот, но нагласи дека тие би морале да бидат „многу промислени и естетски вклопени“.
OpenAI годинава очекува приходи од 12,7 милијарди долари, што е повеќе од тројно зголемување во однос на ланските 3,7 милијарди долари. Сепак, компанијата сè уште троши повеќе отколку што заработува и не очекува да биде профитабилна пред 2029 година.
Извршниот директор Сем Алтман претходно изјави дека реклами би вовел само како последна опција, иако во јуни призна дека „не е целосно против“ таквата идеја. Конкурентската компанија xAI, во сопственост на Илон Маск, веќе планира интеграција на реклами во својот четбот Grok.
