Трамп започна подготовки за средба Путин–Зеленски

Американскиот претседател Доналд Трамп изјави дека по телефон разговарал со рускиот лидер Владимир Путин и започнал подготовки за средба меѓу него и украинскиот претседател Володимир Зеленски.

„Му се јавив на претседателот Путин и иницирав средба на локација што дополнително ќе се утврди. По неа ќе следи трилатерала со двајцата претседатели и мене“, напиша Трамп на „Трут соуашал“, нарекувајќи го тоа „важен ранен чекор за војната што трае речиси четири години“.

Тој нагласи дека потпретседателот Џеј Ди Венс, државниот секретар Марко Рубио и специјалниот пратеник Стив Виткоф веќе се координираат со Москва и Киев. Според американски функционер, средбата би можела да се одржи во Унгарија, иако Кремљ сè уште нема официјално потврдено.

По објавата на Трамп, германскиот канцелар Фридрих Мерц изјави дека состанокот се очекува во следните две недели, додавајќи дека мора темелно да се подготви. Тој истакна дека Украина не смее да биде приморана да се откаже од територии, споредувајќи го тоа со „САД да се откажат од Флорида“.

Мерц го поздрави сигналот на Трамп дека Украина ќе добие безбедносни гаранции во рамки на евентуален мировен договор, нагласувајќи дека тие произлегуваат од долги дискусии меѓу партнерите.

Претходно, Трамп и Зеленски во Белата куќа имаа тет-а-тет разговор, по што им се придружија лидерите на Велика Британија, Германија, Франција, Италија, Финска, ЕУ и НАТО за повеќе од два часа мултилатерални консултации.