Септември станува сè попопуларен избор за одмор, бидејќи нуди бројни предности во споредба со летните месеци. Помалку гужви, пониски цени, поспокојна атмосфера и попријатна клима се меѓу причините зошто многумина решаваат да го одложат својот одмор за почетокот на есента. Овој месец овозможува и поразновидни активности – прошетки, истражување на дестинациите и активен одмор, наместо монотоно минување на деновите меѓу плажата и хотелската соба.
Според најновите прогнози на метеорологот Славчо Попоски, септември 2025 година во Македонија ќе биде потопол од повеќегодишниот просек за околу 1 до 2 степени. Летните температури ќе продолжат и во овој период, но со поумерен интензитет. Во првата седмица се очекува уште еден топол бран од Африка со температури над 30 степени, а во Повардарието и над 35. Потоа следува мало освежување со пријатни, умерено високи температури.
Што се однесува до врнежите, тие ќе бидат нешто помалку од вообичаеното за септември, но повремено ќе има појава на поројни дождови, грмежи, ветер и локални невремиња. Во Европа, пак, месецот ќе биде натпросечно топол, со повеќе врнежи во северните и северозападните предели.
„Слободно може да планирате одмор во септември, како во нашите туристички места така и во регионот, затоа што летото ќе продолжи и во овој месец, но со поумерени температури и попријатни услови за престој“, наведува Попоски.
