Меџити: Инвестиции од 1 милион евра за подобрување на инфраструктурата во Чаир

Изет Меџити, првиот вицепремиер, министер за животна средина и просторно планирање и кандидат за градоначалник на општина Чаир, денеска информира дека во населбата Саат-Кула се реализира еден од најголемите инфраструктурни проекти во општината, со инвестициски износ од 1 милион €. Проектот ќе ги подобри условите за живот на над 2.000 жители.

Во рамки на проектот се заменуваат старите азбестни цевки, со цел обезбедување чиста вода и функционален канализационен систем. Работите се изведуваат на девет улици, во дел од градот кој со години беше запоставен.

Меџити посочи дека само оваа година преку Министерството за животна средина се реализирани инвестиции од над 12 милиони €, без да се вклучат дополнителните 60 милиони € за Универзитетот „Мајка Тереза“ и централниот паркинг.

„Ги реализираме нашите ветувања и вложуваме во подобрување на животот на граѓаните на Чаир“, изјави Меџити.