Високата претставничка за надворешна политика на Европската Унија, Каја Калас, изјави дека е незамисливо руските средства, замрзнати во земјите на ЕУ поради конфликтот во Украина, да ѝ бидат вратени на Москва без Русија да ги надомести штетите предизвикани од војната.
– Воопшто не можеме да замислиме, ако се постигне примирје или мировен договор, тие средства да ѝ бидат вратени на Русија без исплата на репарации – рече Калас пред медиумите, пред почетокот на состанокот на министрите за надворешни работи на ЕУ во Копенхаген.
Според податоците од ЕУ, околу 210 милијарди евра руски имот се замрзнати како дел од санкциите кон Москва поради инвазијата на Украина. Украина и неколку земји-членки, вклучувајќи ја Полска и балтичките држави, апелираат средствата да се конфискуваат и да се користат за помош на Киев.
Сепак, најголемите членки на ЕУ, како Франција, Германија и Белгија, каде што се наоѓа најголемиот дел од замрзнатиот имот, ги одбиваат овие предлози. Тие посочуваат дека идната заработка од овие средства веќе е предвидена за финансирање на помошта за Украина и ја оспоруваат правната основа за конфискација.
Дипломатите истакнуваат дека дискусијата сега се насочува кон тоа како средствата би можеле да се искористат по завршувањето на војната.
