На 11.12.2025 година, околу 14:45 часот, во СВР Скопје е пријавена тешка сообраќајна несреќа на кружниот тек што ги поврзува улиците „Борис Сарафов“, „Лука Геров“, „Македонски војски“ и булеварот „Партизански Одреди“ во Скопје.

Непознат возач со патничко возило марка „мерцедес“ удрил во пешакот Х.М. (34). По несреќата, возачот не застанал да пружи помош, туку со возилото го напуштил местото на настанот.

Повредениот пешак се здобил со телесни повреди, кои биле констатирани во Градската општа болница „Св.Наум Охридски“.

Од страна на увидна екипа на СВР Скопје е извршен увид на местото на настанот и во моментов се преземаат сите неопходни мерки за целосно расчистување на случајот и откривање на сторителот.

Голема полициска акција, раководена од Јавното обвинителство за гонење организиран криминал и корупција, како резултат на повеќемесечна предистражна постапка, изминатата ноќ разби криминална група осомничена за перење пари и неовластено приредување игри на среќа.

Полициски службеници извршија серија претреси на повеќе локации во и околу Скопје. Запленета е голема количина на реквизити за коцкање – од професионални маси за покер, карти и чипови, па сè до друга скапа опрема.

На една од локациите, на дело беа затекнати 14 коцкари среде игра, а пронајдена е и голема сума пари во денари и евра, што ја потврдува сериозноста на нелегалниот бизнис.

Јавниот обвинител донесе наредби за спроведување на две истражни постапки, опфаќајќи вкупно осум лица.

Шестмината осомничени се товарат за формирање на илегално здружување кое, од февруари годинава, континуирано и координирано организирало диви игри на среќа на три локации во Скопје. Без никаква лиценца или дозвола, тие профитирале од нелегалното коцкање.

„Групата, со цел стекнување несразмерна имотна корист, организирала игри како ‘омаха’, ‘покер’, ‘круг’ и ‘брич’. Тие обезбедувале играчи, договарале строги правила и влогови, имале каса за уплата/исплата и ангажирале лица за средување на масите, па дури и помошнички за делење на картите со надомест“, соопшти Обвинителството.

Оваа активност се квалификува како „Приредување игри на среќа без лиценца или дозвола“.

Во втората постапка, еден од осомничените од првата група и уште две лица се сомничат за перење пари. Тие се стекнале со противправна имотна корист од 7.583.784 денари, пари за кои се сомнева дека потекнуваат од кривично дело „Лихварство“.

Парите ги „испрале“ со уплати во готово на свои сметки, примање пари од трети лица и потоа ги користеле за купување недвижен имот, плаќање обврски по кредити и водење на „луксузен начин на живот“.

Обвинителството, сметајќи дека постои висок ризик, ќе побара ефективен притвор за седуммина осомничени. За една осомничена жена, пак, ќе биде предложен куќен притвор.

Оваа акција е јасен показател дека институциите сериозно се справуваат со организираниот криминал, особено со оние кои профитираат на туѓа несреќа и се обидуваат да ги легализираат валканите пари.

Основното јавно обвинителство (ОЈО) Куманово отвори истражна постапка против 84-годишен маж, кој е обвинет за сериозно кривично дело. Обвинителството го гони лицето поради основано сомнение дека извршило обид за убиство, и тоа сторено на суров и подмолен начин, според член 123 став 2 точка 4 во врска со член 19 од Кривичниот законик.

Кривичното дело, како што информираат од Обвинителството, се случило на 4 декември, во хотелски објект во Куманово. Осомничениот 84-годишник, од ниски побуди, со умисла се обидел да лиши од живот една жена.

Според досегашните сознанија, осомничениот утрото искористил момент кога гостин во хотелот ја отворил влезната врата, влегол во објектот и се упатил кон собата каде што престојувале оштетената и нејзиниот неподвижен сопруг.

Кога жената го забележала, таа станала и тргнала кон вратата од собата со намера да го спречи влезот. Во тој момент, осомничениот извадил нож и со него ја удрил жртвата во пределот на главата. Во мигот кога ножот му паднал, оштетената успеала да се повлече и почнала гласно да вика и да бара помош. На повиците реагирал нејзиниот син, кој излегол од другата соба и го спречил натамошниот напад од страна на осомничениот.

По предлог на надлежниот јавен обвинител, на претходнаta постапка при Основниот суд во Куманово определи мерка притвор за осомниченото лице.