(ВИДЕО) Гори фабрика „Винчини“ во Виница – ангажирани повеќе противпожарни екипи

Пожар избувна попладнево во фабриката „Винчини“ во Виница, кој зафатил неколку производни погони, соопшти Центарот за управување со кризи.

Пријавата за пожарот, кој избувнал во магацините и производствените погони 6, 7 и 8, била примена во 18:40 часот преку бројот Е-112. На терен веднаш излегле екипи на ТППЕ Виница со неколку противпожарни возила и пожарникари.

Градоначалникот на Виница добил насока да побара дополнителна поддршка, а веќе се вклучени ТППЕ Кочани и ДПД Кочани со сите свои капацитети, како и поддршка од општините Македонска Каменица и Штип. Доколку се покаже потребно, ќе се ангажираат и дополнителни сили од соседните општини.

Од ЦУК потенцираат дека станува збор за специфичен урбан пожар и дека интервенцијата треба да ја спроведуваат исклучиво професионални пожарникари.