Лукашенко: Путин е подготвен, пречките доаѓаат од Европа
Белорускиот претседател Александар Лукашенко ја обвини Европската унија дека ги кочи мировните напори околу Украина, нагласувајќи дека Москва е подготвена да ги исполни договорите постигнати со САД, но дека напредокот зависи од Киев и неговите западни покровители.
„Русија е подготвена да ги спроведе договорите со Американците. Тоа повеќепати го разговарав со претседателот Путин. Проблемот е во Европејците и кај Зеленски“, изјави Лукашенко.
По средбата на Владимир Путин и Доналд Трамп на Алјаска, американскиот претседател порача дека конфликтот во Украина мора да се реши со траен мировен договор, а не со привремено примирје. Сепак, според Москва, Киев „отворено покажува дека нема интерес за долгорочен мир“.
На средбата со специјалниот пратеник на Вашингтон, Џон Коел, Лукашенко му се заблагодари на Трамп за вложените напори за мир. „Белорусија е подготвена да застане покрај него и да помогне во таа мисија“, нагласи тој.
Белорускиот лидер оцени дека САД се залагаат за решение, додека Брисел и Киев сè уште се надеваат на „поражување“ на Русија на бојното поле – цел која, како што рече, е нереална.
Воедно, Лукашенко ја нападна Полска, обвинувајќи ја дека „како дивјак ја подгрева напнатоста“ со обвинувањата дека руски дронови навлегле во нејзиниот воздушен простор. Според него, белоруските сили пресретнале дел од леталата и навреме ја предупредиле Варшава, но наместо благодарност добиле „хистерија“.
Москва и Минск веќе подолго тврдат дека Брисел ја саботира мировната иницијатива на Трамп, притискајќи го Киев да прифати „неостварливи услови“.
