Основното јавно обвинителство Скопје поведе постапка против четири лица заради основано сомнение дека со заеднички дејствија учествувале во кривичното дело „Загрозување на животната средина и природата со отпад“ според член 230 став 2 во врска со став 1 од Кривичниот законик.
Вечерва, од судија на претходна постапка беше побарана мерка краткотраен 48-часовен притвор за обезбедување на докази. Станува збор за 56-годишен управител и сопственик на две правни лица, 22-годишна управителка на трето правно лице, 42-годишник кој е раководител на подружница, како и 59-годишник вработен во правно лице. Се испитува потенцијална одговорност и на други лица.
Во текот на денот, јавниот обвинител издаде повеќе наредби за обезбедување докази, а надлежните органи продолжуваат со постапување. Се очекуваат и резултатите од извршените мерења на загадувањето од Министерството за животна средина.
