Путин направи чистка: Сменет Дмитриј Козак, сигнал за продолжување на војната
Рускиот претседател Владимир Путин го разреши Дмитриј Козак, заменик-шеф на кабинетот на претседателот, што аналитичарите го толкуваат како сигнал дека Кремљ е решен да продолжи со војната во Украина.
Институтот за проучување на војната (ISW) наведува дека Козак, еден од најблиските соработници на Путин, јавно се спротивставувал на политиката за војната, инсистирајќи на преговори со Украина и на ограничување на воените операции. Според извори на ISW, неговото разрешување укажува дека Путин и неговите советници сега се консолидираат околу максималистички воени цели.
Руски медиуми јавија дека Козак „сам поднел оставка“ на функцијата минатиот викенд, а сега разгледува можности за префрлање во приватен сектор. ISW потсетува дека Козак бил единствениот член на Советот за безбедност на 21 февруари 2022 година кој се спротивставил на целосна инвазија на Украина и дека претходно посредувал во обид за договор кој требало да спречи приклучување на Украина кон НАТО, но Путин го одбил.
Козак изгуби влијание откако во последните месеци советувал да се запре војната и да се започнат мирни преговори, додека раководството на Кремљ, вклучително и заменик-шефот на администрацијата Сергеј Кириенко, ја презема контролата над стратегијата за Украина.
