ВЛЕН со реакција по последните настапи на ДУИ, оценувајќи дека владејачката партија е „прозирна и очајна поради поразот што ја чека на 19 октомври“.
„Со половина раководство ставено на црни листи за висока корупција, тие одржуваат прес-конференции за ’вредностите‘ на Европската унија,“ се наведува во реакцијата.
Според ВЛЕН, уште поиронично е тоа што ДУИ, „стегната во ќош од резултатот што ја очекува на локалните избори, се здружила со анти-НАТО и анти-ЕУ партијата на Апасиев во Гостивар, Тетово и Струга. А сега зборуваат за ЕУ!“
ВЛЕН потсетува дека токму ДУИ, и покрај јасните противења на стратешките партнери, го изменила Кривичниот законик „за да го подготви враќањето на Никола Груевски и да овозможи ослободување на Сашо Мијалков“.
„Ова е истата ДУИ која секогаш ја користела Европската унија како фасада, а во позадина го хранела корупцискиот систем,“ велат од ВЛЕН.
Во реакцијата се поставуваат и три прашања за ДУИ:
Кога Али Ахмети последен пат имал средба со релевантен меѓународен фактор?
Дали добивте одговори на писмата што ги испраќавте ’низ светот‘?
Зошто го толериравте градоначалникот на Липково да краде и да ги труе жителите со арсен?
Од ВЛЕН нагласуваат дека за разлика од ДУИ, нивната коалиција преку Планот за раст и Реформската агенда „реално го приближува земјата до европските стандарди преку конкретни реформи и инвестиции“.
