Аеродромите во Данска и Норвешка вчера беа привремено затворени поради појава на дронови во контролираниот воздушен простор, што доведе до прекин на летови, пренасочувања и долги доцнења.
Во Копенхаген, контролата на летање повеќепати алармираше за беспилотно летало во близина на пистите, по што сообраќајот беше стопиран. Полицијата соопшти дека движењето на дронот укажува на „високо ниво на умешност“ и отвори истрага за можни организирани мрежи или модифицирана опрема.
Сличен инцидент беше забележан и во Норвешка, каде што сообраќајот беше кратко прекинат, а потоа постепено нормализиран. Во двата случаи нема повредени или материјална штета, но властите предупредуваат дека управување со дрон во близина на аеродром е строго забрането и казниво.
Операторите потсетија дека по вакви упади следува задолжителен безбедносен протокол – стопирање на летови, процена на ризик и враќање на сообраќајот по расчистување на зоната. Истрагите продолжуваат, а патролите и системите за детекција на дронови ќе бидат засилени.
