Министерството за здравство, во соработка со Универзитетската клиника за пулмологија и алергологија, организира дводневни бесплатни прегледи за жителите на Трубарево и околните населени места по неодамнешниот пожар во објект за електронски отпад.
Прегледите ќе се одржат денеска и утре, најавија министерот за здравство Азир Алиу и директорот на Клиниката за пулмологија, Оливер Зафировски.
Две медицински екипи со амбулантни возила ќе вршат комплетен клинички преглед, спирометрија, ЕКГ и други потребни испитувања. Прегледите се наменети за сите жители, а особено за оние што имаат потешкотии со дишењето или симптоми поврзани со заболувања на дишните патишта.
„Нашата цел е да обезбедиме навремена и квалитетна здравствена грижа и да ги детектираме можните последици од изложеноста на штетните материи. Доколку се потребни дополнителни испитувања, тие ќе бидат извршени веднаш или пациентите ќе бидат упатени на Клиниката“, изјави министерот Алиу.
Амбулантните возила ќе бидат поставени кај маркетите „Бренд“ и „Флорида“.
