Втора вечер по ред, над данското небо се појавија неидентификувани дронови, потврди Министерството за одбрана на Данска. Инцидентите, кои се случија во близина на воени бази и доведоа до привремено затворање на аеродромот во Копенхаген, предизвикаа реакција на НАТО. Алијансата најави засилување на мисијата на Балтичкото Море со испраќање фрегата за противвоздушна одбрана и дополнителни средства за надзор.
НАТО вечерва објави и фотографија од најголемиот носач на авиони во светот – американскиот USS Gerald R. Ford, кој заплови во норвешките води, во Ослофјордот. „Ова не се гледа секој ден“, стои во објавата на Алијансата.
Слични случаи со дронови се регистрирани и во Норвешка, во близина на базата Ørland, каде полицијата потврди дека воени безбедносни тимови забележале летала и јужно и северно од пистата.
Засилувањето на присуството е дел од мисијата „Балтички стражар“, активирана уште во јануари по серијата оштетувања на подморски кабли и гасоводи. Ситуацијата добива дополнителна тежина во пресрет на самитот на Европската политичка заедница што неделава ќе се одржи во Копенхаген.
Претседавачот на Воениот комитет на НАТО, адмирал Џузепе Каво Драгонe, истакна дека Алијансата веќе развива протудронски мерки во соработка со командата во Норфолк, САД. „Мораме да најдеме баланс помеѓу заканата и трошоците. Во моментов користиме авиони Ф-35 и Ф-18, но бараме поекономични решенија“, рече тој.
На вежби во Хамбург, како и во Португалија и Холандија, беа тестирани нови технологии за неутрализирање на дронови, и на воздух и под вода. Дел од системите се дизајнирани за урбани средини и користат методи за фаќање и контролирано приземјување, наместо оружје, со цел да се избегне колатерална штета.
„Сведоци сме на ситуација каде скапи борбени авиони се користат за пресретнување евтини дронови, произведени со 3D технологија. Нашата цел е да создадеме поевтини и ефикасни одговори“, нагласи контраадмирал Масимилијано Роси од Командата за специјални операции на НАТО.
Некои од новите решенија, додаваат од Алијансата, инспирација црпат дури од воздушните битки со цепелини пред повеќе од еден век.
