РКЕ: Грејната сезона стартува на 15 октомври

Од 15 октомври почнува грејната сезона, можни кратки прекини со гас

Регулаторната комисија за енергетика (РКЕ) соопшти дека грејната сезона официјално ќе трае од 15 октомври 2025 до 15 април 2026 година. Доколку температурата се спушти под 12 ºС, греењето може да започне уште од 1 октомври, а да заврши најдоцна на 30 април.

Во периодот од 13 до 17 октомври се очекува прекин во испораката на природен гас поради ремонти на регионалните системи и гасоводот „Турски тек“. Од НОМАГАС уверуваат дека количините ќе бидат соодветно распределени за да нема сериозни проблеми со снабдувањето.

Според правилниците, снабдувачите се должни да обезбедат температура од 20 ±1 ºС во грејните простории од 06:00 до 22:00 часот.

РКЕ апелира до станарите и заедниците на станари да ги проверат внатрешните инсталации и редовно да ги подмируваат сметките за електрична енергија за топлинските потстаници, со цел новата сезона да започне без проблеми.