Илјадници Срби мирно оддадоа почит на жртвите од падот на настрешницата во Нови Сад

Илјадници граѓани денеска учествуваа во комеморативни маршеви во десетици градови низ Србија, одбележувајќи 11 месеци од трагичниот пад на настрешницата на железничката станица во Нови Сад, при што загинаа 16 лица, претежно млади, а едно лице доби трајни повреди, пренесе Индекс.

Прошетката во тишина, под мотото „11 месеци – 0 одговорност“, беше организирана од студентското движење, кое претходно ја предводеше серијата протести поврзани со трагедијата. Движењето истакнува дека институциите не презеле соодветни мерки и дека корупцијата и небрежноста се клучни причини за несреќата.

Во Нови Сад, голема поворка се собра пред железничката станица и одржа 16-минутно молчење за секоја загината жртва. Студентите ги повикаа граѓаните на голем комеморативен собир на 1 ноември, на годишнината од трагедијата.

Слични мирни протести се одржаа и во Белград, каде учесниците положуваа бели рози за секоја минута молчење и користеа видео проекции на 16 силуети како симбол на загинатите. „Алчноста ја донесе нашата земја во сегашната состојба“, рече еден од студентите пред почетокот на молчењето.

Студентското движење, со поддршка од академската заедница и општествените групи, побара од властите одговорност, достоинство и правда за жртвите, како и решителна борба против корупцијата. Меѓу учесниците беше и Дијана Хрка, мајка на еден од загинатите млади.

Протестните маршеви во повеќето градови, според белградските медиуми, поминале без инциденти.