Американските воени претставници побарале од изведувачите на одбранбени проектили да ги зголемат залихите на десетина клучни оружја, вклучувајќи пресретнувачи на ракети „Патриот“, противбродски ракети и прецизни бомби, објави „Волстрит џурнал“.
Администрацијата на претседателот Доналд Трамп постојано предупредува на можноста за ескалација на тензиите со Кина, особено поради економските спорови и заканата од кинеска инвазија на Тајван. Истовремено, залихите на американски ракети се намалени поради континуираната поддршка за Украина. Заменик-министерот за одбрана, Стив Фајнберг, започна разговори со големите одбранбени компании за зголемување на производството на критично оружје, вклучувајќи „Стандард мисикл 6“, „Прецизниот удар“ и противбродски ракети со долг дострел.
Меѓу системите што се опфатени се:
Пресретнувачи THAAD – за уништување балистички ракети на високи надморски височини, со дострел до 200 километри; Ракети за прецизен удар (PrSM) – долг дострел до 480 км за уништување копнени цели; Противбродски ракети LRASM – „стелт“ ракети со дострел над 320 км и боева глава од 1.000 фунти; Крстосувачки ракети JASSM – долг дострел до 1.600 км за уништување бункери и критична инфраструктура; Ракети Patriot PAC 3 – одбранбено оружје со дострел до 35 км за соборување ракети и авиони.
Во јули, администрацијата на Трамп потпиша закон со кој се издвојуваат милијарди долари за зголемување на производството на муниција во следните пет години. Сепак, проценките покажуваат дека трошоците би можеле да бидат значително повисоки, а производството на сложени системи како THAAD и Patriot бара време и големи инвестиции.
Изведувачи како „Локид Мартин“ и „Рејтеон“ веќе започнаа со подготовки, вклучувајќи вработување дополнителни работници и проширување на фабриките во очекување на потенцијални нарачки. Експертот Том Карако од Центарот за стратешки и меѓународни студии истакна дека производителите не можат да започнат без јасна финансиска поддршка од владата.
Зголемувањето на производството ја отсликува загриженоста на Пентагон за можен конфликт со Кина, нагласувајќи ја важноста на подготовките, но истовремено отвора прашања за трошоците и логистиката на овие масовни набавки.
