САД веројатно нема да ѝ испорачаат на Украина крстосувачки ракети со долг дострел „Томахавк“, и покрај тоа што тие години наназад се на листата желби на Киев, објави Ројтерс, повикувајќи се на неименуван американски официјален извор и три други извори.
Оваа вест ја намалува надежта дека украинскиот арсенал наскоро ќе биде значително зајакнат, пишува „Киевски независник“. Одлуката доаѓа како изненадување, откако потпретседателот на САД Џ. Д. Венс неодамна изјави дека Вашингтон ја разгледува молбата на Киев за ракети со дострел до 1.000 милји.
Само украинскиот претседател Володимир Зеленски, наводно, инсистирал на ова прашање за време на средбата со Доналд Трамп на маргините на Генералното собрание на ОН на 23 септември.
Иако САД располагаат со значителен број ракети „Томахавк“, официјални лица објасниле дека постоечките залихи се првенствено наменети за американската морнарица. Вашингтон изгледа претпочита да ѝ обезбеди на Украина системи со краток дострел или да овозможи европските сојузници да набават оружје со долг дострел за Киев.
Ракетите „Томахавк“ се клучен дел од американскиот арсенал, познати по способноста да летаат на ниски височини, да изведуваат одбранбени маневри и да ја пренасочуваат целта во лет. За Украина, таквото оружје би било пресвртница, овозможувајќи прецизни удари врз командни центри и логистички чворишта длабоко на руската територија.
Кремљ веќе реагираше на можноста за испорака, а портпаролот Дмитриј Песков предупреди дека Русија ќе одговори „на соодветен начин“ доколку Вашингтон испорача „Томахавки“. Од друга страна, рускиот претседател Владимир Путин на форумот Валдај ја оцени потенцијалната испорака како воено незначајна.
Во моментов Украина се потпира на западни ракети „Storm Shadow“ со дострел од 250 километри, значително помал отколку кај „Томахавк“, додека Русија и понатаму има значителна предност и редовно ги гаѓа украинските градови со ракети „Калибр“ и „Искандер“.
Оваа дискусија се одвива во контекст на новиот договор за вооружување, преку кој администрацијата на Трамп ѝ доставува помош на Киев. Првиот пакет, одобрен на 16 септември, веќе вклучуваше системи „Патриот“ и „HIMARS“.
