Спорт

Дарио Ивановски го освои Скопскиот маратон со моќен финиш

Најдобриот македонски атлетичар, Дарио Ивановски, триумфираше на Скопскиот маратон со време од 2:14,50 часа, оставувајќи ја зад себе конкуренцијата од Кенија и други држави.

Ивановски ја темпираше трката беспрекорно – долго време беше во водечката група, потоа падна на втората позиција, но со моќен финиш го престигна кениецот Џулијан Кипкоеч и по вторпат се закити со титулата на домашниот маратон. Кипкоеч заврши втор со заостанување од 30 секунди, а третото место му припадна на грузискиот Давити Каразишвили.

Во женска конкуренција победничка беше Кенијката Ирине Џеруто, додека второто место го освои Маринела Нинева од Бугарија со време 2:45:36 часа, а третата беше Ана Јусупова од Азербејџан со 2:48:10 часа.

Во полумаратонската трка, најбрзо време постигнаа Албион Имери во машка и Греса Бакрачи во женска конкуренција. Имери ја истрча патеката за 1:07:57 часа, а македонските натпреварувачи Иван Пешовски и Александар Арсов завршија втор и трет со 1:11:30 и 1:12:52 часа. Во женска конкуренција, Греса Бакрачи од Косово ја освои победата, додека Теа Божиновска и Милјана Ристиќ-Стојчевска ја пополнија победничката тројка.

На најмасовната трка од пет километри, учествуваа околу 10.000 учесници, а победата им припадна на Григоријан Никовски и Ирма Хајдари. Во штафетниот маратон „ЕУ за спорт“, победници во машка конкуренција беа „Врањски маратонци“ со време од 2:26:34 часа.

Спорт

Меси размислува за пауза од Светското првенство 2026

Аргентинската фудбалска легенда Лионел Меси најави дека постои можност да го пропушти Светското првенство кое ќе се одржи следното лето, нагласувајќи дека можеби ќе го следи турнирот од трибините, наместо да настапува на теренот.

„Се надевам дека ќе можам да бидам таму. Веќе реков дека би сакал да учествувам. Но, во најлош случај, ќе бидам присутен и ќе го гледам во живо, што сепак ќе биде посебно“, изјави Меси, цитиран од ESPN.

Осумкратниот добитник на „Златната топка“ ќе наполни 39 години во јуни и додава дека сѐ уште има желба за натпреварување, но возраста и физичката подготвеност можат да влијаат на неговото учество на престојниот турнир.

Спорт

МАКЕДОНИЈА СЛАВИ ПРОТИВ ТУРЦИЈА НА ОТВОРАЊЕТО НА ТУРНИРОТ ВО АНКАРА

Женската ракометна репрезентација на Македонија стартуваше успешно на турнирот во Анкара, совладувајќи ја домашната селекција на Турција со 29:26. Натпреварот беше израмнет најголемиот дел од времето, со 12:12 на полувреме, но избраничките на селекторот Кристијан Грчевски го презедоа контролата во финишот и стигнаа до важен триумф.

Емилијана Ризоска блескаше со 11 постигнати гола, додека голманката Драгана Петковска се истакна со 10 интервенции, меѓу кои и одбрана на седмерец, што значително го насочи натпреварот во корист на Македонија.

Нашите ракометарки утре од 12 часот ќе играат против Словенија, а турнирот ќе го затворат в недела со дуел против Словачка, кој започнува во 10 часот.

Спорт

ВИДЕО: Димитриевски херој: Одбрани пенал во 119., па Валенсија ја нокаутира Картагена!

Валенсија со многу мака и драматични моменти избори пласман понатаму, откако по 120 минути фудбал успеа да го совлада второлигашот Картагена со 2-1. Херој на вечерта беше македонскиот голман Столе Димитриевски, кој со блескава интервенција во самиот финиш го задржа тимот во игра.

Картагена поведе во првото полувреме, кога Ортуно успеа да го совлада Димитриевски, па домаќините ја завршија паузата со водство од 1-0. Тоа резултатско преимуство траеше сè до 80. минута, кога Белтран погоди и донесе израмнување за Валенсија.

Кулминацијата на драмата се случи во 119. минута, кога Картагена доби пенал. Санчез шутираше, но Димитриевски со фантастична одбрана ја спаси својата екипа и го одржа резултатот жив. Само две минути подоцна, во 121. минута, Васкез одлично реагираше и погоди за конечни 2-1, обезбедувајќи победа и големо славје за гостите.

Димитриевски ја обележа вечерта со одбрана која директно ја смени судбината на натпреварот и уште еднаш потврди дека е еден од најсигурните голмани во Ла Лига.

Видеото може да го погледнете тука