Претседателот на Хрватска, Зоран Милановиќ, учествуваше на состанокот на шефовите на држави од процесот Брдо-Бриони во Драч, каде коментираше за актуелни прашања поврзани со Европската Унија.
Милановиќ ја критикуваше иницијативата на Словенија и Германија за донесување одлуки во ЕУ со квалификувано мнозинство, наместо едногласно. „Нема поддршка ниту од хрватската Влада, ниту од мене. Едногласноста може да се смени само со измени на основните договори, што е комплициран процес. Во тоа гледам стапица и инстинктивна одбрана на малите држави од поголемите“, изјави Милановиќ.
Тој нагласи дека поголемите земји имаат значително влијание, кое треба да се контролира за да се обезбеди фер избор на лидери. „Некои земји се преголеми за да бидат третирани на ист начин како другите, и тоа едноставно треба да се држи под контрола“, додаде претседателот на Хрватска.
Милановиќ се осврна и на тврдењата на унгарскиот премиер Орбан дека ЕУ е пред колапс. „Европската унија нема да се распадне. Тоа е голем проект во кој е инвестирано многу време и пари. Дури и ако некој сакаше да ја уништи, тоа не би било возможно, а никој од нас не го сака тоа“, рече тој.
Тој посочи дека ЕУ започнала како мировен проект, но дека денес веќе има и нови функции, како избор на комесари за одбрана, што ја прави структурно различна од првичната визија.
