Хрватска од почетокот на следната година повторно ја враќа задолжителната воена служба, потврди министерот за одбрана Иван Анушиќ. Тој најави дека законите за одбрана и служба во вооружените сили треба да бидат усвоени во парламентот следната недела, по што ќе започне спроведувањето на новиот модел на регрутација.
Анушиќ изјави дека во ноември и декември ќе започнат подготовките и повиците за основна воена обука, а првите регрути се очекуваат во касарните во јануари. Основната обука ќе трае два месеци и ќе вклучува физичка подготовка, самоодбрана, моторни вештини и техники за преживување.
Пред започнување на обуката, сите кандидати ќе минат лекарски преглед за да се утврди нивната способност, но тој нема да содржи тестирање за опијати, бидејќи тоа не е законски дозволено без согласност.
Министерот објасни дека моделот на двомесечна обука е преземен од постојниот систем на доброволна служба, кој од 2008 година успешно функционира. Доколку регрутите покажат интерес за понатамошна кариера, ќе можат да потпишат договор и да продолжат со специјализирана обука.
Според Анушиќ, спроведувањето на воената обука ќе ја чини државата околу 20 милиони евра годишно. Во процесот, покрај Министерството за одбрана, ќе бидат вклучени и министерствата за внатрешни работи и здравство.
Министерот додаде дека за цивилна служба надоместокот ќе биде значително помал отколку за оние кои ќе ја извршуваат воената обука во касарните.
