Денеска, 23 октомври, ја одбележуваме годишнината од еден од најзначајните датуми во македонската историја – Денот на македонската револуционерна борба. На овој ден, во 1893 година, во Солун била основана Внатрешната Македонско-Одринска Револуционерна Организација (ВМОРО), чија цел била ослободување и автономија на Македонија преку организирана револуционерна борба.
Дејноста на ВМОРО ја достигнала својата кулминација со Илинденското востание во 1903 година во Македонија и Преображенското востание во Одринска Тракија – симболи на вековната борба за слобода и национално обединување.
Организацијата е формирана на 5 ноември 1893 година (23 октомври според стариот календар), во куќата на книжарот Иван Хаџи Николов во Солун. На основачкиот состанок присуствувале шестмина македонски интелектуалци и родољуби:
Д-р Христо Татарчев – лекар од Ресен,
Даме Груев – учител од с. Смилево, Битолско,
Петар Поп Арсов – учител од с. Богомила, Велешко,
Иван Хаџи Николов – книжар од Кукуш,
Антон Димитров – учител од с. Ајватово, Солунско,
и Христо Батанџиев – учител од с. Гуменџа, Ениџе Вардарско.
Од нивниот завет за слободна и обединета Македонија се роди идејата што ги обедини генерациите низ времето – идејата за држава, самобитност и достоинство на македонскиот народ.
