Израелската компанија за безбедност и анализа „CGI Group“ соопшти дека добила необична порака од лице што се претставило како претставник на групата која стои зад грабежот во музејот Лувр. Според информациите на германскиот весник Билд, непознатото лице ја контактирало фирмата преку нејзината официјална веб-страница и понудило можност за откуп на дел од украдениот накит преку „darknet“.
„Пет дена по грабежот, добивме порака од некој што се претстави како портпарол на крадците. Ни рече дека имаме 24 часа да одговориме ако сакаме да разговараме за купување на украдените уметнички дела,“ изјави основачот и директор на „CGI Group“, Звика Наве.
По детална внатрешна анализа, компанијата утврдила дека испраќачот навистина може да располага со барем дел од украдените скапоцености. Случајот веднаш бил пријавен во француската полиција, но до овој момент накитот сè уште не е пронајден.
Грабежот во Лувр се случи на 19 октомври, кога четворица крадци со помош на кран за мебел влегле во галеријата Аполо и однеле девет парчиња накит, меѓу кои и круната на царицата Евгенија украсена со 1.354 дијаманти. Според проценките, вредноста на украдените предмети изнесува околу 88 милиони евра, а истрагата сè уште трае.
