Република

Пробиштип доби нов градоначалник: Тоневски со порака за единство и развој

Во Општина Пробиштип денес беше одржана свечена церемонија на која Општинската изборна комисија (ОИК) ги додели Уверенијата за новиот градоначалник и членовите на Советот. Новоизбраниот градоначалник Тони Тоневски истакна дека овој документ не е само административна формалност, туку симбол на довербата која граѓаните му ја дале.

„Ова уверение е обврска што ја прифаќам со голема одговорност. Граѓаните покажаа јасна волја за развој и за нова енергија во Пробиштип. Промените започнуваат“, изјави Тоневски.

Тој упати честитки до членовите на ОИК за успешно спроведените локални избори, како и до сите избрани советници, при што повика на заедничка и конструктивна работа.

„Советот е место каде се носат одлуки од значење за секој жител на општината. Очекувам конструктивни дебати, одговорност и соработка во интерес на граѓаните“, додаде Тоневски.

Новиот градоначалник порача дека следуваат конкретни чекори за подобрување на секојдневниот живот во Пробиштип, нагласувајќи дека заедничката работа со граѓаните ќе биде начело на неговото функционирање.

„Промените не се збор, туку дело – и ги почнуваме сега“, заклучи тој.

Република

„Шпанец“ се враќа на пругите: Модернизиран и подготвен за патници

Легендарниот воз „Шпанец“, некогаш заборавен и речиси отпишан, се враќа на пругите со целосно нов лик. Денес беше тестирана обновената верзија на возот, кој сега располага со модерен дизајн, телевизори, озвучување, алармни системи и видео надзор.

Одговорните најавуваат дека подготовките за поудобно и побезбедно патување се во полн ек, со цел патниците да уживаат во современо и безбедно патување.

Следуваат уште новости за враќањето на овој легендарен воз – останете со нас за сите детали.

Видеото може да го погледнете тука

Република

После многу години конечно Тетово ќе се украсува

На онлајн седница одржана денеска, 12 декември 2025 година, Советот на Општина Тетово со мнозинство гласови донесе одлука за украсување на градот за претстојните новогодишни празници.

„За оваа програма „за“ гласаше советничкото мнозинство составено од Коалицијата „Вреди“ и ВМРО-ДПМНЕ, додека против беа советниците од коалицијата НАИ. Воздржани беа од Подобро за Тетово, Левица и СДСМ. Со оваа одлука, Општина Тетово ја потврдува намерата градот да добие празничен сјај за крајот на 2025 година“, изјави претседателот на Советот, Јусуф Абдули.

Истовремено, изгласана е измена на Програмата за активности на Општина Тетово во областа на културата за 2025 година. Според новата програма, за празничното украсување се предвидени еден милион и петстотини илјади денари, што е над 24 илјади евра.

Република

Коњановски ги прими просветните работници на годината од Битола

Градоначалникот на Битола, Тони Коњановски, денеска оствари средба со добитничките на признанието „Просветен работник на годината“ за учебната 2024/2025 година – Наташа Тодоровска, наставник по одделенска настава во ОУ „Ѓорѓи Сугарев“, и Аница Б. Златевска, психолог во ОУ „Коле Канински“.

Коњановски им честиташе за значајното признание доделено од Министерството за образование и наука и Сојузот на просветни работници, нагласувајќи дека ваквите награди се симбол на поширока општествена заложба за почит и вреднување на улогата на наставниците, воспитувачите и стручните соработници во образованието.

Тој истакна дека трудот на просветните работници е фундаментален за формирањето на идните генерации и дека локалната самоуправа ќе продолжи да ја поддржува нивната работа.

Признанијата се доделуваат во рамките на кампањата „Магијата е во знаењето“, која Министерството ја реализира по повод 5 Октомври – Светскиот ден на учителите, со цел истакнување на незаменливата улога на учителите и зголемување на општествената почит кон нив.