Меџити најавува нови проекти со Македонско-турската стопанската комора

Градоначалникот на Општина Чаир и коалициски лидер во Владата, Изет Меџити, денес оствари средба со делегација од Стопанската комора Македонија–Турција (МАТТО), составена од Фатих Шахбаз, Ајдован Адемоски, Имер Селмани и Шахпаз Молалиев.

На состанокот, кој помина во конструктивна атмосфера, двете страни разговараа за зајакнување на економската соработка и креирање заеднички визии за нови развојни проекти. Фокусот беше ставен на поттикнување инвестиции, инфраструктурна поддршка, партнерства во образованието и вработувањето, како и организирање деловни настани што ќе овозможат посилно вмрежување меѓу бизнис-заедниците.

Меџити ја нагласи подготвеноста на Општина Чаир да соработува на иницијативи кои носат одржлив развој, економска динамика и нови перспективи за жителите, притоа високо оценувајќи ја активната улога и отвореноста на МАТТО.