Градските власти воведуваат ново правило според кое граѓаните на Скопје нема да смеат да фрлаат отпад во контејнерите во периодот од 22:00 до 06:00 часот. Непочитувањето на мерката ќе се санкционира со казна од 50 евра.
Од Градот објаснуваат дека новата забрана има за цел да овозможи поефикасно празнење на контејнерите, да се спречи натрупување отпад и да се намали создавањето депонии околу нив.
Претседателот на Советот на Град Скопје, Даме Димитровски, истакна дека оваа пракса е преземена од големи светски метрополи. „Во Истанбул отпадот се фрла само 15 минути пред пет часот наутро. Во Токио, секој камион за различен вид отпад има строго утврден распоред. Очекувам дека и кај нас оваа мерка ќе стане уште поуспешна кога ќе се постават контејнери за селекција“, рече тој.
