Пензионираниот британски државен службеник Дерек Ричи (63) се соочува со задолжително враќање на 28.640 евра, кои ги добивал преку преплаќања во последните 11 години, поради грешка во пресметката од 2014 година, соопштија надлежните служби.

Во март, Ричи добил писмо со извинување за „евентуалните непријатности“ и можност да ги врати парите преку банкарски трансфер или на рати, пишува „Гардијан“. Сепак, тој велеше дека не добил целосно објаснување за ситуацијата. Три месеци подоцна, му било соопштено дека ќе следи тужба доколку не ги врати средствата.

„Во последните 11 години донесував одлуки и планови врз основа на бројките што ми беа дадени, а грешката ќе ми предизвика значителни тешкотии“, изјави Ричи, кој поради стресот бил препишан лекови за депресија и анксиозност. Тој планирал целосно пензионирање во 2027 година, но сега вели дека ќе мора да се врати на работа за да го отплати долгот.

Ричи е меѓу стотиците пензионери погодени од административни грешки во системот „MyCSP“, кој во 2019 година призна дека се обидува да наплати милиони евра од повеќе од 2.000 пензионери. Грешките биле откриени при ревизија, но преплаќањата на Ричи првично останале незабележани, постепено растејќи од околу 230 евра годишно на 4.500 евра.

Во октомври, парламентарната комисија го критикуваше управувањето со пензиските шеми и предложи да се врати директна контрола на државните служби. Во моментов, системот е во рацете на компанијата „Capita“, која ветува модернизација и подобрување на услугите за пензионерите.

Бројот на Руси кои веруваат во постоењето на тајни организации што управуваат со светските настани порасна во последните години, покажува анкета на Серускиот центар за проучување на јавното мислење (VCIOM), пренесена од The Moscow Times.

Според резултатите, во 2022 година 37% од Русите верувале во постоењето на „тајна светска влада“, додека во 2025 година тој број достигнал 40%. Истовремено, 46% од граѓаните не се согласуваат со оваа теорија на заговор.

Најголема поддршка за ваквите верувања има меѓу постарите граѓани и гледачите на државната телевизија. Меѓу Русите родени од 1948 до 1967 година, 50% веруваат во оваа тајна влада, додека меѓу младите родени по 1992 година, такви се само 26%.

Социолозите објаснуваат дека во периоди на длабоки општествени промени и неизвесност, теориите на заговор им нудат на луѓето едноставни објаснувања за сложени случувања, како политички одлуки или економски кризи. Според историските податоци на VCIOM, по распадот на СССР во 1992 година, 48% од Русите верувале во тајни организации.

Резултатите од истражувањето покажуваат дека меѓу актерите на „светската влада“ Русите најмногу ги вбројуваат олигарсите и милијардерите (25%), американската елита (19%), масоните (4%), семејството Ротшилд (3%) и Рокфелер (2%). Поддршката за „англосаксонскиот свет“ како центар на тајните влијанија се зголемила по почетокот на инвазијата во Украина.

Исто така, анкета спроведена во 2024 година покажала дека секој десетти Русин е подготвен да поверува во постоењето на вонземски живот ако тоа го изјави претседателот Владимир Путин, додека официјалните медиуми би убедиле 6%, а пријателите само 3% од испитаниците.

Концертот на Наташа Беквалац, кој требаше да се одржи во Штип во Спортската сала Тошо Арсов на 27-ми декември, е одложен. Информацијата ја соопшти организаторот, кабаре Клик, а во појаснувањето кое објавија наведуваат дека не сакале да бидат дел од политички наративи и дебати, кои не биле во нивниот домен.

-Во изминативе денови околу планираниот концерт на Наташа Беквалац се создадоа дискусии и толкувања кои ја надминуваат рамката на она што ние како организатори го работиме – музика, забава и искуство за публиката.

Нашата визија никогаш не била да бидеме дел од политички наративи, анализи или дебати кои не се во нашиот домен. И токму затоа, со целосна почит кон сите страни и со желба се да остане во духот на позитивната енергија, донесовме одлука концертот да го одложиме, искатнуваат од организацијата.

Од таму додаваат дека сакаат настанот да се случи во време и услови кога единствен фокус ќе биде уметноста, емоцијата и атмосферата, а не теми кои не припаѓаат на светот на забавата.

-Нашата публика заслужува чисто и убаво искуство – без врева, без превирања и без дополнителни толкувања. Оваа одлука ја носиме зрело и одговорно, со желба да создадеме вечер што ќе биде паметена по музика, а не по околностите, порачаа од кабарето.

Инаку, на концертот на Беквалац беа најавени и музичките гости Жаре Бербер и диџеј Нело.