Балкан

Дали Србија е во опасност да остане без нафта?

Нафтена индустрија на Србија (НИС) соопшти дека рафинеријата во Панчево започнува подготовки за прекин на работата поради недостиг на нафта за преработка, предизвикан од санкциите што Министерството за финансии на САД ги воведе врз компанијата.

Во првата фаза, постројките се ставени во „топла циркулација“, при што процесот се спроведува согласно законите на Србија, внатрешните правила на НИС и најстрогите еколошки и безбедносни стандарди. Компанијата истакнува дека ќе се врати во нормален режим штом ќе се обезбеди достапност на сирова нафта.

НИС исто така посочува дека продолжува со снабдување на домашниот пазар со нафтени деривати од претходно обезбедени резерви и нагласува дека не придонела за воведување санкции кои ја загрозуваат работата на компанијата и социјалната стабилност на над 13.500 вработени.

Народната банка на Србија денеска објави дека, доколку НИС не добие лиценца за работење во предвидениот рок, ќе ги прекине платните трансакции со компанијата за да се заштити стабилноста на домашниот финансиски систем. Гувернерката Јоргованка Табаковиќ посочи дека секундарните санкции би значеле целосно блокирање на сите плаќања, што е сценарио што банката се надева дека ќе се избегне.

Балкан

Атина: 38 приведени за време на годишнината од убиството на тинејџерот

Во центарот на Атина вечерва избувнаа судири меѓу демонстранти и полицијата за време на маршот по повод 17-годишнината од убиството на Александрос Григоропулос. Полицијата употреби солзавец и шок-бомби, а 38 лица беа приведени, од кои осум се уапсени.

Тензии се појавија кога дел од демонстрантите се обидоа да се упатат кон квартот Егзархија, но полицијата ги спречи. Метро станиците „Панепистимио“ и „Синтагма“ беа затворени од 17 часот по наредба на властите.

Слични протести се одржаа и во Солун, каде беа приведени десет лица. Убиството на 15-годишниот Григоропулос во 2008 година останува симбол на борбата против полициската бруталност, а годишнината и годинава беше обележана со судири и засилено полициско присуство.

Балкан

Брод со мигранти се превртел кај Крит: 18 загинати, двајца преживеани

Грчката крајбрежна стража пронајде брод со 18 загинати мигранти покрај брегот на Крит, јави грчката јавна телевизија ERT News. Двајца преживеани изјавиле дека ја изгубиле контролата над бродот за време на бура, останувајќи на отворено море без вода и храна.

Сè уште не е познато од каде потекнуваат жртвите, а форензичарите и истражителите работат на утврдување на околностите околу несреќата. Моќна бура беснее во морето околу Крит, со налети на ветер над 90 километри на час.

Според УНХЦР, криумчарски банди продолжуваат да испраќаат мигранти по опасната рута од Тобрук во Либија кон Крит, а речиси 17.000 мигранти пристигнале на островот до почетокот на декември 2025 година.

Балкан

(ВИДЕО) Автомобил „полета“ над кружен тек – дијабетска криза ја предизвикала несреќата

Тешка сообраќајна несреќа се случи во Романија кога возач на „мерцедес“ ја изгуби контролата врз автомобилот и буквално прелета над две возила на кружен тек.

Mercedes flies over 2 cars in Romania, a 55-year-old driver lost control due to a medical problem, but he survived the crash with moderate injuries, and refused hospitalization pic.twitter.com/YoGn1YZuOZ
— Global Eye News🌐 (@globaleeyenews) December 5, 2025

На видеото кое кружи на социјалните мрежи јасно се гледа дека автомобилот возел со голема брзина, ја пресекол кружницата и „полетал“ над другите возила пред да удри во столб на надзорна камера и да застане на зелена површина покрај блиска бензинска пумпа.

Возачот, 55-годишен маж, останал заробен во автомобилот, но спасувачите успеале да го извлечат. Тој претрпел само полесни повреди и е однесен во болница на контрола, без потреба од хоспитализација.

Тестовите покажале дека не консумирал алкохол или дрога, а причината за несреќата е дијабетска криза која го спречила да реагира додека возел.