Здравствените власти низ Европа предупредуваат на забрзано ширење на две опасни габични инфекции – едната брзо се шири во Велика Британија, додека другата претставува растечка закана во европските болници.
Првата, Trichophyton indotineae, позната како „супер-габа“, сè почесто предизвикува упорни и болни кожни инфекции. Втората, Candidozyma auris (C. auris), е потенцијално смртоносна и лесно се шири во болнички услови.
Т. indotineae со години е распространета во епидемиски размери на индискиот потконтинент. Во Британија, каде што претходно беше ретка, бројот на случаи во последните три години пораснал за речиси 500%. Денес сочинува 38% од сите дерматофитни изолати, а загрижува честата отпорност на тербинафин – вообичаениот лек за габични инфекции.
Инфекцијата лесно се пренесува, а симптомите се црвени, болни и силно чешачки осипи, најчесто во препоните и околу гениталната област. Погрешно се дијагностицира како егзема или псоријаза, што го отежнува лекувањето. Во отпорните случаи, потребна е долготрајна терапија со итраконазол, кој носи ризик од оштетување на срцето и црниот дроб.
Втората закана, C. auris, откриена во 2009 година во Јапонија, денес е присутна на сите континенти освен Антарктик. Во Велика Британија, меѓу ноември 2024 и април 2025 се регистрирани 134 нови случаи – раст од 23%.
Оваа габа најчесто живее на кожата без симптоми, но може да предизвика тешки инфекции ако навлезе во крвотокот, мозокот или внатрешните органи. Особено е опасна за пациенти со слаб имунитет и за оние во интензивна или долготрајна болничка нега. Опстојува со недели на површини и медицинска опрема и е отпорна на повеќе антифунгални терапии.
Европските инфектолози предупредуваат дека бројот на случаи расте и дека без строги мерки за контрола, ризикот може сериозно да се зголеми. Болниците остануваат најранливи.
Превенцијата подразбира засилена хигиена, внимателно изолирање пациенти, темелна дезинфекција и редовно лабораториско тестирање за навремено откривање.
Здравствените институции во Европа повикуваат на будност, предупредувајќи дека глобалниот ризик може да се намали само со брза реакција и строг надзор во болничките средини.
