Борисов: ГЕРБ е спремна за предвремени избори доколку буџетот не биде изгласан

Бугарската владејачка партија ГЕРБ денеска објави дека е подготвена да се соочи со предвремени парламентарни избори, откако низ земјата избувнаа масовни протести, а претседателот Румен Радев побара итна оставка од владата поради неуспехот да се изгласа буџетот за 2026 година.

Лидерот на ГЕРБ, Бојко Борисов, на Фејсбук порача дека повеќе нема да толерира, како што ги нарече, „неразумните барања“ поврзани со предложениот буџет. Тој им порача на политичките партнери дека треба или да формираат стабилно мнозинство од 121 пратеник за подготовка на нов буџет, или земјата да се упати на нови избори.

Ова е прва негова јавна реакција по големите антивладини демонстрации против предложениот буџет за следната година, пренесува Радио Бугарија.

Протестите – кои ги предводат опозициските партии, синдикатите и граѓанските иницијативи – бараат оставка од владата, а претседателот Радев предложи распишување предвремени избори како начин за надминување на политичката блокада.

Денеска, бугарскиот парламент треба да го разгледа повлекувањето на предлог-буџетот во евра, како и иницијативата на претседателот за одржување референдум за воведување на еврото од 1 јануари 2026 година.

Владата веќе го повлече буџетот по масовниот протест во Софија, каде што десетици илјади граѓани се спротивставија на предвидените промени – зголемување на даноците и придонесите во приватниот сектор и пренасочување на повеќе средства кон државните институции.

Протестни маршеви се одржаа и во повеќето големи градови, меѓу кои Варна, Пловдив, Бургас, Стара Загора и Русе. На неколку места дојде до тензии меѓу демонстрантите и полицијата, која ги обезбедуваше канцелариите на владејачките партии. Во Варна, присуството на групи навивачи дополнително ја зголеми нервозата, иако организаторите ги повикаа да избегнуваат провокации и насилство.