Црна Хроника

Обид за бегство заврши со трагедија: Тројца мигранти изгубија живот во Сава

Рано утрово, во реката Сава, во близина на Славонски Брод стана сцена на ужасна трагедија кога чамец полн со мигранти се преврте во водите. Несреќата се случи на делот помеѓу Самостан и поранешната Бродјанка, одземајќи ги животите на три лица – две жени и еден маж.

Според првичните информации, групата мигранти се обидувала да ја премине реката во чамец што, за жал, не ја издржал пловидбата.

Веднаш по дојавата, на местото на настанот интервенираа сите расположливи служби: пожарникари, полиција, итната помош и припадниците на Хрватската горска спасувачка служба (ХГСС). Нивната брза реакција резултираше со извлекување на осум преживеани од водите на Сава.

Сепак, бројот на исчезнати и жртви сѐ уште е предмет на истрага, бидејќи различните извештаи сугерираат дека во чамецот имало меѓу 11 и 13 лица. Хрватските медиуми јавуваат дека станува збор за мигранти од Кина и Турција.

Меѓу спасените се наоѓа и еден државјанин на Босна и Херцеговина, за кого постои сериозно сомневање дека е директно вмешан во организиран криминал и трговија со луѓе.

Осомничениот е хоспитализиран, но е ставен под строг полициски надзор, додека надлежните органи работат на расветлување на целата мрежа која стои зад оваа трагична рута.

Овој случај ја отвора повторно болната тема за ризичните мигрантски патишта и бруталната експлоатација од страна на криминалните групи.

Црна Хроника

4News: Приведен поранешниот државен правобранител – истрага за сериозни коруптивни сомнежи

Поранешниот Државен правобранител на Македонија, Фехми Стафа, вечерва е приведен во рамки на полициска акција, поради сомневања за тешко коруптивно кривично дело. Апсењето на поранешниот висок функционер, кој беше задолжен за заштита на државниот имот, предизвика силни реакции во јавноста.

Засега нема официјално соопштение од институциите, но според првични информации, постојат сериозни индиции за вмешаност во коруптивни активности.

Според неофицијални и непотврдени сознанија од истрагата, Стафа е лишен од слобода под сомнение за примање поткуп. Извори блиски до истражните органи наведуваат дека станува збор за сума од неколку десетици илјади евра, која наводно била побарана или примена со цел извршување или неизвршување службено дејствие.

Во овој момент не се соопштени детали за начинот и околностите под кои е извршено апсењето, ниту дали предметот опфаќа и други осомничени лица. Се очекува Министерството за внатрешни работи и надлежното Јавно обвинителство во текот на ноќта или утрешниот ден да информираат за случајот и за правната квалификација на делото.

Стафа на функцијата државен правобранител беше именуван како предлог на Алтернатива, а во јавноста беше поврзуван и со ДУИ. Во изминатиот период против него биле поднесувани и повеќе пријави до Финансиската полиција.

Државниот правобранител е институција задолжена за застапување и заштита на имотните и правните интереси на Република Македонија пред судовите и органите на државната управа.

Извор: 4news.mk

Црна Хроника

Осум повредени во сообраќајка на патот Гостивар–Тетово

Денеска (13.12.2025) во 20:05 часот на патот Гостивар-Тетово после клучка ,,Камењане”, настанала сообраќајна незгода помеѓу патничко возило ,,Мерцедес” со австриски регистарски ознаки и патничко возило ,,БМВ” со тетовски регистарски ознаки. Во незгодата со повреди се здобиле осум лица кои со возила на итна медицинска помош се пренесени во Клинички центар Тетово. Поради вршење на увид, сообраќајот се одвива по една коловозна лента.