Движењето ЗНАМ јавно се огради од бизнис-активностите на Сашо Петровски, нагласувајќи дека во случај надлежните институции да утврдат конфликт на интереси, тие имаат обврска да постапат строго согласно законот.
Од ЗНАМ појаснуваат дека Петровски бил носител на советничката листа за Општина Кисела Вода, но не извршувал и не извршува никаква партиска функција во движењето. Оттаму потенцираат дека организацијата не е поврзана со неговите приватни деловни ангажмани.
„ЗНАМ се залага за транспарентност, отчетност и почитување на законите. Доколку постои сомнеж за судир на приватни и јавни интереси, тоа треба да биде предмет на проверка од надлежните органи“, се наведува во реакцијата.
Движењето додава дека секој поединец мора да одговара за сопствените постапки и дека ниеден член, симпатизер или кандидат не смее да биде над законот, без оглед на неговата политичка или јавна улога.
Со оваа реакција, ЗНАМ порачува дека не прифаќа компромиси кога станува збор за етичко однесување, а јавноста очекува институционален одговор доколку се утврдат неправилности.
