Струга денеска доби посебен повод за радост – првото бебе родено во градот оваа година, малата Надја, беше посетена од градоначалникот Менди Ќура и неговиот тим. Девојчето се роди со импресивни 4.210 грама и во одлична здравствена состојба, заедно со својата мајка Милица, за која ова е трето дете.
Градоначалникот ја искористи посетата за да им упати искрени честитки и најдобри желби за здравје и среќа, посакувајќи ѝ бериќетно и радосно детство на малата Надја, како и многу љубов и топлина во семејниот дом.
„Овој радосен настан носи посебна симболика – е нов почеток за целото семејство, но и за нашата заедница. Со секое новороденче, Струга добива надеж и свежа енергија“, истакна градоначалникот Ќура.
Посебна благодарност беше упатена до директорот Бунчески и целиот тим на Гинеколошко-акушерското одделение, чија посветеност и професионализам, дури и по целоноќно дежурство, донесоа насмевки и топло добредојде за мајката и бебето.
Честитки за тимот кој го следеше породувањето и грижата за мајката и детето беа упатени и до раководителката на одделението, д-р Виолета Насуфи Расиди, главната акушерка Гордана Пејоска, дипломираните акушерки Снежана Миливојевиќ и Татјана Кутаноска, како и акушерката Марјана Петреска. „Вашата работа е гаранција за сигурност, доверба и нови животи во нашиот град“, додаваат од Општина Струга.
