Американскиот претседател Доналд Трамп најави дека во рок од три дена ќе ги објави сите детали за можниот мировен договор што САД го предлагаат во обид да се стави крај на конфликтот меѓу Русија и Украина.

„Имавме навистина добри состаноци околу прашањето на Украина и Русија,“ изјави Трамп, дополнувајќи дека договорот би можел да биде постигнат уште оваа недела, со „многу добри шанси“ за успех.

Според извештај на агенцијата „Блумберг“, предлогот на Вашингтон вклучува неколку клучни точки: постепено укинување на санкциите кон Русија во замена за продолжен прекин на огнот, можност за признавање на анексијата на Крим од 2014 година, како и гаранции дека Украина нема да се приклучи на НАТО.

Сега, САД го очекуваат одговорот на Киев. Според најавите, украинскиот став ќе биде соопштен на заеднички состанок со американски и европски претставници, кој ќе се одржи подоцна оваа недела во Лондон.

​Портпаролот на кинеското Министерство за надворешни работи, Гоа Џиаку, денеска изјави дека Кина ги предупредува Филипините да не си „играат со оган“ со одржување заеднички воени вежби со Соединетите Американски Држави.​

Џиаку нагласи дека тие кои се „играат со оган, ќе се изгорат“. Тој истакна дека заедничките воени вежби на САД и Филипините, кои вклучуваат распоредување на стратешко и тактичко вооружување, го поткопуваат регионалниот мир и економскиот развој. ​

Портпаролот повторно ја нагласи позицијата на Кина дека прашањето на Тајван е „внатрешна работа на Кина“. Тој апелираше за воздржаност и почитување на суверенитетот и територијалниот интегритет на Кина.​

Овие изјави доаѓаат во контекст на зајакнување на воената соработка помеѓу САД и Филипините, што предизвика загриженост во Пекинг поради можните импликации за стабилноста во Југоисточна Азија.

Папата Франциск ќе биде погребан во базиликата Санта Марија Маџоре.

Ватикан денеска го објави тестаментот и последната на починатиот папа Франциск, во која тој изразил дека не сака да биде погребан во базиликата Свети Петар, каде што почиваат голем дел од неговите претходници, туку во базиликата Санта Марија Маџоре во Рим.

Во својата последна желба, папата Франциск нагласил дека сака неговиот погреб да биде скромен – без посебни украси или церемонии. Над неговиот гроб, според неговата желба, ќе биде поставена едноставна плоча со натпис „Franciscus“.

Дополнително, тој посочил дека веќе се договорил со еден, неименуван, добротвор кој ќе ги покрие трошоците за неговиот погреб, пренесе францускиот весник „Фигаро“.

Да потсетиме, папата Франциск почина по мозочен удар и последична срцева слабост. Официјалната потврда за причината на смртта беше објавена денеска од страна на Андреа Арканџели, директорот на Управата за здравство и хигиена на Ватикан.