Граѓаните низ Европа се меѓу најголемите љубители на алкохол во светот, но порастот на консумацијата го носи и сериозен ризик по здравјето, предупредува Светската здравствена организација (СЗО). Во новиот извештај на организацијата, се истакнува дека алкохолот станува се подостапен во многу земји од ЕУ, додека владите сè помалку ги користат даноците како алатка за контрола на потрошувачката.
Пивото, на пример, е поевтино во 11 европски држави, а кај жестоките пијалаци трендот е уште поизразен – дури 17 земји бележат пад на цените. Особено тревожно е тоа што во 14 членки на ЕУ, вклучувајќи ги големите производители како Италија и Шпанија, виното воопшто не се оданочува.
Резултатот е загрижувачки: седум од десетте земји со највисока потрошувачка на алкохол во светот се токму во Европа, а меѓу најголемите потрошувачи се Романија, Летонија и Чешка. „Подостапниот алкохол поттикнува насилство, повреди и болести“, предупредува Етјен Круг, директор во СЗО.
Организацијата нагласува дека алкохолот е главен ризик-фактор за рак, кардиоваскуларни заболувања и депресија, дополнително оптоварувајќи ги здравствените системи. Затоа, СЗО повикува владите да преземат конкретни мерки за намалување на потрошувачката, а зголемувањето на даноците на алкохолните пијалоци се смета за една од најефикасните стратегии.
Слична загриженост се изразува и за засладените пијалаци. Од 2022 година, тие станале поевтини и подостапни во 13 земји на ЕУ, што според СЗО го зголемува ризикот од дебелина, дијабетес и срцеви заболувања. Организацијата апелира владите да реагираат итно, користејќи даночни механизми за заштита на јавното здравје.
