Раководството на Алијансата за Албанците, предводена од Арбен Таравари, едногласно одлучи да поднесе колективни оставки, објави ТВ21. Одлуката е донесена на последната седница на партијата и е мотивирана со цел организациско освежување и вклучување на нови кадри.
„Одлуката е донесена за спроведување длабоки и сеопфатни реформи кои ќе го зајакнат политичкиот профил и внатрешното функционирање на Алијансата за Албанците“, наведуваат од партијата, додавајќи дека оставките се и рефлексија на резултатите од локалните избори.
До одржувањето на Собранието и конгресот, управувањето со партијата ќе го извршува претседателот Арбен Таравари, а Собранието ќе ги констатира поднесените оставки.
Според статутарните рокови, Собранието на Алијансата за Албанците се очекува да се одржи во средината на февруари, додека конгресот ќе се одржи најдоцна до есента 2026 година.
