Општина Битола започна акција за справување со потенцијално опасни објекти во градот. До 24 сопственици на куќи кои се закануваат да се урнат или да испуштат делови од фасади, керемиди и други предмети на јавни површини, односно на коловозите и тротоарите, веќе се испратени писмени известувања.
Според локалната самоуправа, од сопствениците се очекува брза реакција и преземање на мерки за обезбедување на објектите, согласно законите за градење и за локална самоуправа. Некои од куќите се празни, а дел од сопствениците живеат во странство или ги напуштиле своите домови, но безбедноста на граѓаните и учесниците во сообраќајот не смее да биде компромитирана.
„Веруваме дека објектите можат да се обезбедат на подобар начин. Сопствениците не смеат да ги запоставуваат своите имоти“, истакнаа од Општината.
Во меѓувреме, формирана е комисија која врши увид на терен за да ја утврди вистинската состојба на куќите. Сопствениците се должни да ги означат објектите како опасни и да преземат итни заштитни мерки. Доколку некој објект е под заштита, интервенцијата е во надлежност на Управата за заштита на културното наследство.
