По повод четири години по почетокот на целосната руска инвазија врз Украина, украинскиот претседател Володимир Зеленски испрати силна видео порака од Киев. Во видеото, тој отвори дел од бункерот на улицата Банкова, местото од каде што во првите денови на војната се јавуваше на светските лидери, барајќи помош и оружје за украинските сили.
„Точно четири години поминаа од оној ден кога Путин мислеше дека за три дена ќе ја завземе Украина. Наместо тоа, нашата земја се спротивстави, нашите луѓе се изборија“, истакна Зеленски, нагласувајќи ја храброста и отпорноста на милиони Украинци кои не се поколебаа пред окупаторите.
Во својата обиколка низ бункерот, Зеленски ја покажа организацијата на првите воени брифинзи и комуникацијата со сојузниците. „Нашиот народ не ги покажа белите знамиња. Наместо тоа, се појавија редици пред регрутните центри и сите избраа отпор. Нашите воини останаа непоколебливи, а цивилите бранеа градови, села, улици и дворови, создавајќи вистински човечки ѕидови против напредувањето на руските сили“, рече тој.
Претседателот се потсети и на ужасите на првите недели од инвазијата, уништените градови како Буча, Ирпин, Бородјанка и Мариупол, масовните гробници, нападите врз болници и станбени објекти. „Ова не е начинот на кој луѓето треба да се однесуваат. Украина нема да заборави“, додаде Зеленски, упатувајќи порака до оние кои ја поддржуваат руската агресија.
Во последните четири години, Украина ја зголеми својата одбранбена способност од донирани панцири до модерни системи како „Патриот“, „Ирис-Т“, „НАСАМС“ и борбени авиони „Ф-16“. Националната индустрија произведува милиони беспилотни летала годишно, а украинските сили успешно соборуваат стотици беспилотни летала „Шахед“ за една ноќ, покажувајќи способност за големи тактички операции.
„Силата што не одржува се луѓето. Нашиот отпор е во секој маж и жена во Украина, во секој што не се предава“, рече Зеленски, додавајќи благодарност до воините, нивните семејства, здравствените работници, волонтерите, наставниците и сите кои со својот труд ја прават Украина посилна.
На крајот, претседателот испрати порака на надеж: „Иако ја поминуваме најсуровата зима во нашата историја, пролетта доаѓа за помалку од една недела. Путин не успеа, Украинците не се поразени, и ние ќе го зачуваме мирот и правдата“.
Украинскиот народ, како што порача Зеленски, продолжува да го брани својот пат со истата решителност и храброст како на самиот почеток, со поглед свртен кон иднината и непоколеблива вера во победата.
