Црногорската полиција извршува претрес на имот во центарот на Подгорица кој му припаѓа на бизнисменот Ацо Ѓукановиќ, брат на поранешниот претседател Мило Ѓукановиќ.
Станува збор за објект во кој се наоѓа и филијала на Прва банка, финансиска институција во сопственост на Ацо Ѓукановиќ. Засега нема официјални информации за причините за полициската акција, ниту за тоа дали таа е поврзана со конкретна истрага.
Ацо Ѓукановиќ важи за еден од најбогатите луѓе во Црна Гора. Во 2006 година ги купи акциите на Никшиќка банка, која една година подоцна беше преименувана во Прва банка. Неговото богатство се проценува на повеќе стотици милиони евра.
Покрај банкарскиот сектор, тој поседува и други компании кои некогаш биле во државна сопственост, а процесот на нивна приватизација се одвивал во периодот кога неговиот брат беше на власт.
Според медиумските извештаи, по парламентарните избори во 2020 година, Ацо Ѓукановиќ се преселил во Луксембург. Засега нема информации дали тој е присутен во земјата за време на спроведувањето на претресот.
