Нафтен танкер беше нападнат во неделата на околу пет наутички милји од крајбрежјето на регионот Масандам во Оман, соопшти Морскиот безбедносен центар на земјата. Во инцидентот се повредени четири лица, додека целиот екипаж од 20 членови бил безбедно евакуиран.
Станува збор за бродот „Skylight“, кој пловел под знамето на Палау, островска држава во западниот Пацифик. Засега не се соопштуваат детали за причините и извршителите на нападот.
Во спасувачката операција учествувале единици на оманската морнарица и армијата, кои брзо реагирале на настанот. Од Морскиот безбедносен центар наведуваат дека акцијата ја потврдува подготвеноста на земјата за справување со вакви поморски инциденти.
Овој напад се случува во чувствителен регион, во период кога Оман има важна дипломатска улога како посредник во разговорите меѓу Иран и САД за нов нуклеарен договор.
