По завршувањето на седницата на Советот за безбедност, претседателката Гордана Сиљановска-Давкова испрати порака до јавноста дека безбедносната состојба во државата е стабилна и под контрола.
И покрај турбуленциите и ескалацијата на тензиите на Блискиот Исток, таа уверува дека ниту земјава ниту регионот во моментов не се соочуваат со директни безбедносни закани. Според неа, институционалниот систем функционира координирано и будно ја следи состојбата.
Претседателката посочи дека механизмите за рано предупредување се активни, а надлежните служби се во постојана комуникација и размена на информации. Проценките што се прават, како што нагласи, се темелат на релевантни податоци и анализи, што овозможува навремена реакција доколку околностите се променат.
Таа потенцираше дека соработката со партнерските служби продолжува непречено, а вниманието останува насочено кон развојот на настаните надвор од границите на државата. Институциите, додаде, ќе продолжат внимателно да ја мониторираат ситуацијата и да одржуваат тесна координација со регионалните безбедносни структури, со цел да се зачува стабилноста и сигурноста на граѓаните.
