Во организација на Сојузот на училишен спорт – Прилеп и Општина Прилеп, денеска беа доделени награди и признанија на учениците и училиштата кои ја освоија титулата општински прваци во 20 спортски категории за учебната 2025/2026 година.
Градоначалникот Дејан Проданоски истакна дека младите спортисти се вистинска гордост на градот, нагласувајќи дека нивниот успех е резултат на посветена работа, труд и континуирана поддршка.
Во текот на изминатата година беа реализирани бројни натпревари во различни спортски дисциплини, со масовно учество на ученици од основните и средните училишта. Дополнително, беа организирани и повеќе спортски манифестации, што, според надлежните, покажува дека училишниот спорт во Прилеп има стабилен развој, квалитет и континуитет.
Проданоски нагласи дека освоените пехари и признанија се доказ за системската работа, како и за вложениот труд на учениците, наставниците и менторите, но и за поддршката од училиштата и семејствата. Тој додаде дека спортот игра важна улога во воспитувањето на младите, развивајќи дисциплина, тимски дух, почит и истрајност.
Градоначалникот им честиташе на сите наградени ученици и училишта, како и на Сојузот на училишен спорт за нивната посветеност и придонес.
Од Општина Прилеп најавуваат дека и во иднина ќе продолжат со активна поддршка на училишниот спорт, со фокус на подобрување на условите за спортување, модернизација на спортската инфраструктура и создавање нови можности за развој на младите таленти.
….
