Поради новото зголемување на цените на горивата, во Босна и Херцеговина расте загриженоста од можен нов бран поскапувања на храната. Во повеќе градови е забележана зголемена куповна активност на основни прехранбени производи, а во некои продавници полиците со брашно, масло и шеќер се празнат побрзо од вообичаено.
Трговците велат дека граѓаните сè почесто купуваат поголеми количини брашно и масло, правејќи домашни залихи за наредниот период. Купувачите неретко земаат и цели вреќи брашно, стравувајќи дека цените на храната наскоро дополнително ќе се зголемат.
„Сега има недостиг, барем овде во Зеничко-добојскиот кантон. Имаме објект каде што се купува само брашно и има редици. Луѓето бараат брашно, масло, шеќер и гориво. Паниката е голема, особено поради случувањата на Блискиот Исток“, изјави Ферида Куловиќ од Здружението за заштита на потрошувачите за „Дневни аваз“.
Дополнителна нервоза кај граѓаните создава и нестабилната геополитичка ситуација, особено поради тензиите на Блискиот Исток. Дел од населението стравува дека евентуално продлабочување на кризата може да предизвика нов раст на цените на енергијата и дополнителен притисок врз животниот стандард.
Во меѓувреме, трговците во долината на Неретва во Хрватска забележуваат зголемен број купувачи од Босна и Херцеговина. Според хрватските медиуми, последните денови има поголем прилив на граѓани од соседната држава кои таму купуваат основни производи.
Особено барано е месото, најмногу свинското, кое во хрватските продавници е значително поевтино отколку во БиХ. Поради разликата во цените, многу граѓани ја преминуваат границата за да заштедат при набавка на прехранбени производи.
Економистите посочуваат дека засега нема официјални најави за недостиг на храна, но предупредуваат дека паничното купување може привремено да доведе до празни полици во маркетите. Тие апелираат граѓаните да купуваат разумно, нагласувајќи дека синџирите на снабдување во моментов функционираат без поголеми прекини.
