Иранска балистичка ракета погоди област во близина на градот Ал-Харџ во Саудиска Арабија, при што, според првичните информации, најмалку две лица загинале, а 12 се повредени.
Информацијата првично се појави на социјалните мрежи и брзо се прошири низ светските медиуми. Според извештаите, ракетата погодила подрачје во близина на Ал-Харџ, град кој се наоѓа јужно од саудиската престолнина Ријад и во кој се наоѓаат и значајни воени и индустриски објекти.
На видеата што се шират на интернет се гледаат сирени, светла од службите за итна интервенција и паника меѓу жителите, додека спасувачките екипи пристигнуваат на местото на ударот. Засега нема официјални информации за точната цел на нападот, ниту за обемот на материјалната штета.
Овој напад доаѓа во момент кога конфликтот меѓу Иран, Израел и нивните регионални сојузници продолжува да ескалира, а аналитичарите предупредуваат дека секој нов удар може да го прошири конфликтот на уште повеќе држави во регионот.
Саудиска Арабија досега има силни безбедносни врски со САД и западните сојузници, па секој директен напад на нејзина територија се смета за сериозен безбедносен инцидент со потенцијал за поширока регионална ескалација.
Засега саудиските власти не објавија официјално соопштение, а се очекуваат дополнителни информации за последиците од нападот и за евентуалниот одговор на Ријад.
