Американскиот претседател Доналд Трамп упати остро предупредување до Иран, нагласувајќи дека САД ќе одговорат со многу посилна сила доколку Техеран се обиде да го наруши протокот на нафта од регионот.
На прес-конференција одржана во Флорида, тој изјави дека Вашингтон нема да дозволи, како што рече, „терористички режим“ да ја загрозува глобалната енергетска безбедност или да го држи светот под притисок преку евентуална блокада на снабдувањето со нафта. Според него, доколку Иран се одлучи на таков потег, одговорот на САД ќе биде значително посилен.
Трамп порача дека Техеран треба внимателно да размисли пред да преземе такви чекори, алудирајќи дека евентуалната ескалација би имала сериозни последици.
Во меѓувреме, претседателот ја минимизираше тежината на конфликтот, нарекувајќи ја евентуалната војна со Иран „кратко патување“ и „мала екскурзија“ во обраќање пред републикански конгресмени. Сепак, во своите изјави испрати и поостри сигнали за целите на операцијата, нагласувајќи дека САД нема да се повлечат додека противникот не биде целосно поразен.
Тој откри дека американската војска веќе започнала напади врз иранските капацитети за производство на беспилотни летала. Тој тврди дека операцијата се одвива побрзо од планираното и дека уништувањето на клучните цели на терен е во тек.
Според Трамп, кампањата се приближува кон својата завршна фаза. Иако воените активности сè уште траат, тој оцени дека САД веќе можат да зборуваат за успешен тек на операцијата.
Американскиот претседател потенцираше дека конфликтот ќе се смета за завршен дури кога Иран ќе биде лишен од можноста да развива оружје кое би претставувало закана за САД, Израел или нивните сојузници, барем на подолг временски период.
