Американскиот претседател Доналд Трамп откри дека имал „значаен и конструктивен“ телефонски разговор со рускиот лидер Владимир Путин, во кој главните теми биле војната во Украина и ескалацијата на кризата на Блискиот Исток.
Од својата база во голф-клубот во Флорида, Трамп изјави пред новинарите дека разговорот со Путин, што се одржал претходниот ден, бил „многу добар“ и дека двајцата лидери ги споделиле своите гледишта за тековните конфликти.
„Постојат длабоки тензии помеѓу претседателот Путин и украинскиот лидер Володимир Зеленски, тие едноставно не можат ниту да се погледнат во очи“, истакна Трамп. „Сепак, сметам дека дискусијата беше позитивна и отворена.“
Трамп нагласи дека Путин, покрај прашањето за Украина, покажал и интерес да придонесе кон деескалација на конфликтот со Иран.
„Му реков дека може да биде многу пополезен ако помогне да се стави крај на војната во Украина. Тоа би било вистински придонес“, рече американскиот претседател.
Од Кремљ, советникот за надворешна политика Јуриј Ушаков го опиша разговорот како „длабок и суштински“ и најави дека може да има конкретни импликации за идната соработка меѓу САД и Русија. Според Ушаков, Путин претставил неколку предлози за брзо политичко решение на кризата поврзана со Иран, поврзувајќи ги со неговите контакти со лидери од Персискиот Залив, иранскиот претседател, и други меѓународни чинители.
„Размената беше многу суштинска и, без сомнение, прагматична“, изјави Ушаков, додавајќи дека Трамп ја искажал својата проценка за текот на операцијата што ја водат САД и Израел, оценувајќи ја како значајна точка на разговорот
Рускиот претставник исто така наведе дека Трамп верува оти постигнување на брз прекин на огнот во Украина и трајно политичко решение би било во американскиот интерес. Ушаков потенцираше дека руските сили, како што рече, „значително напредуваат на фронтот“, што според него може да создаде дополнителен притисок врз Киев да седне на преговарачка маса.
