Австралија им одобри визи на пет ирански фудбалерки откако тие одбија да ја пеат националната химна на Иран на меѓународно натпреварување, потег што предизвика силни реакции во нивната земја и стравувања за нивната безбедност доколку се вратат дома.
Инцидентот се случил на денот кога беше убиен иранскиот врховен лидер, Ајатолахот Хамнеи, по што фудбалерките за време на натпреварот одбиле да ја пеат химната на Иран.
Нивниот чин брзо предизвика бурни реакции во иранските медиуми и во јавноста.
Иранската државна телевизија ги прогласила фудбалерките за „државни непријатели и предавници во време на војна“, што дополнително ја зголеми загриженоста за нивната судбина.
По завршувањето на првенството, фудбалерките требало да се вратат во Иран, но се појавиле сериозни стравувања дека режимот може да ги казни веднаш по нивното враќање, па дури и да им се закани со најтешки санкции.
Ситуацијата станала уште подраматична кога камери снимиле дел од фудбалерките како сигнализираат СОС од автобусот со кој по натпреварот се враќале кон хотелот, што беше протолкувано како знак дека се чувствуваат загрозени.
Случајот предизвика силен меѓународен притисок врз австралиските власти да им обезбедат азил или барем привремена заштита за да не мора да се вратат во Иран.
Под притисок на јавноста и активистите за човекови права, Австралија на крајот им одобри визи на петте фудбалерки, што им овозможува да останат во земјата додека се разгледува нивниот статус и можноста за подолгорочна заштита.
Во приказната се вклучи и поранешниот американски претседател Доналд Трамп, кој јавно повика тие да бидат спасени и да им се помогне да не се вратат во Иран.
Случајот предизвика големо внимание во светската јавност, бидејќи се смета дека спортот повторно станал поле на политички и општествени конфликти, а одлуката на фудбалерките да не ја пеат химната се толкува како чин на протест против режимот во Техеран.
Меѓународните организации за човекови права предупредуваат дека доколку се вратат во Иран, тие би можеле да се соочат со сериозни последици, поради што апелираат да им се обезбеди долгорочна заштита.
